عبدالعزيز ميمڻ، مولانا: ناميارو ليکڪ، ترجما نگار، عربي ٻوليءَ ۽ ادب جو عالمي شهرت يافته اسڪالر ۽ استاد علامه عبدالعزيز ميمڻ، 23 آڪٽوبر 1888ع تي گوندل، ڪاٺياواڙ ۾ پيدا ٿيو. سندس والد جو نالو حاجي عبدالڪريم هو. عبدالعزيز ميمڻ جي پيدائش کانپوءِ سندس خاندان لڏي اچي راجڪوٽ ۾ رهائش پذير ٿيو. هن اردو ۽ فارسيءَ جي ابتدائي تعليم راجڪوٽ مان حاصل ڪئي. 1901ع کان 1909ع تائين تعليم حاصل ڪرڻ لاءِ دهليءَ هليو ويو. جتي شيخ الحديث ميان نذير حسين ۽ مولانا محمد بشير سمهواڻيءَ جو شاگرد رهيو. ان کان پوءِ شيخ حسين ابن شيخ محسن انصاريءَ جو شاگرد ٿيو. ان کان سواءِ قاضي شوڪاڻيءَ کان حديث ۾ سند حاصل ڪيائين. 1913ع ۾ ايڊورڊ ڪاليج پشاور ۾ عربيءَ جو استاد مقرر ٿيو. 1920ع ۾ اورينٽل ڪاليج لاهور سان بطور استاد منسلڪ ٿيو. ڪجهه عرصي بعد علي ڳڙهه ڪاليج سان وابسته ٿيو، جتان 1950ع ۾ رٽائر ٿيو. ورهاڱي کانپوءِ خاندان سميت لڏي اچي ڪراچيءَ ۾ رهائش پذير ٿيو، جتي 1954ع ۾ اسلامي ريسرچ انسٽيٽيوٽ جو ڊائريڪٽر مقرر ٿيو. 1956ع ۾ ڪراچي يونيورسٽيءَ ۾ عربي شعبي جو صدر مقرر ٿيو. 1964ع ۾ پنجاب يونيورسٽي لاهور ۾ عربي شعبي ۾ صدر مقرر ٿيو. کيس عربي ٻولي ۽ ادب تي دسترس حاصل هئي. عرب ملڪن ۾ ‘استاد الميمني’ ۽ ‘امام اللغة’ جي نالن سان مشهور هو. سندس تصنيف ۽ مرتب ڪيل ڪتابن جو انگ ٽيهه آهي. هن جا ڪتاب مصر جي جامعه الازهر ۽ عرب دنيا جي ٻين يونيورسٽين ۾ پڻ پڙهايا وڃن ٿا. سندس ادبي ۽ علمي خدمتن عيوض حڪومت پاڪستان کيس صدارتي اوارڊ سان نوازيو. ان کان سواءِ کيس 1966ع ۾ الازهر يونيورسٽيءَ پاران کيس ڊاڪٽريٽ جي اعزازي ڊگري پڻ ڏني وئي. هن 27 آڪٽوبر 1978ع تي وفات ڪئي. کيس ڪراچيءَ ۾ سوسائٽي قبرستان ۾ دفنايو ويو.
1888.10.23 عيسوي
علامه عبدالعزيز ميمڻ، 23 آڪٽوبر 1888ع تي گوندل، ڪاٺياواڙ ۾ پيدا ٿيو.
1978.10.27 عيسوي
مولانا عبدالعزيز ميمڻ 27 آڪٽوبر 1978ع تي وفات ڪئي. کيس ڪراچيءَ ۾ سوسائٽي قبرستان ۾ دفنايو ويو.